Су ішу қалай тыныштануға көмектеседі.

Неліктен күйгелектенген кезде су ішкен жөн.

Жүйкеңіз сыр бергенде, жағымсыз эмоциялар бойлағанда «су ішу» деген қарапайым кеңес өте пайдалы және уақтылы болуы мүмкін. Бір жұтым су мазасыздықтан арылуға және тыныштануға көмектеседі, мидың жұмысын қалыпқа келтіреді.

Сусыздану психикалық жағдайға қалай әсер етеді.

Соңғы жылдары медицина ғылымының біздің психикамызға түрлі тағамдар мен сусындардың әсерін зерттейтін бөлімі – нутрициялық психиатрия белсенді дамып келеді. Адам ағзасының 60-80% құрайтын су — ең маңызды қоректік заттардың бірі, сусыз өмір сүру мүмкін емес және сусызданудың алдын алу физикалық денсаулықты ғана емес, психикалық денсаулықты да сақтауға көмектеседі.

2015 жылы «Nutrition Review» журналында жарияланған Суонси университетінің (Ұлыбритания) психологтары тіпті аздаған сусыздану адамның көңіл-күйі мен психикалық жағдайына қалай әсер ететінін зерттеді. Денедегі судың жетіспеушілігі неғұрлым жоғары болса, көңіл-күй мен ұйқы нашарлайды, күш аз, ойлау қиын, жүйке кернеуі жоғары болып, тітіркену, ашу, ызалану, алаңдаушылық сияқты жағымсыз эмоциялар көбейеді.

Біздің психикамыздың жағдайы сумен тікелей байланысты екендігі,  тіпті қалыпты сусызданудың өзі теріс әсер ететіндігі көптеген  зерттеулердің нәтижелерімен расталады.

Сонымен, 2014 жылы «PLoS One» журналында жарияланған француз ғалымдары көп су ішуге дағдыланған адамдар судың жетіспеуі немесе толық болмай қалу қаупі туындаған кезде қатты алаңдай бастайтынын анықтады. Ал оларда суға қол жеткізуге аздаған болса да мүмкіндік пайда болғанда  қуаныш сезімінің артуы байқалған.

Тағы бір ауқымды зерттеу көрсеткендей, күніне бес стақан немесе одан да көп су ішуге дағдыланған адамдарда депрессия мен мазасыздық қаупі азаяды, ал күніне екі стақан су ішетіндерде бұл қауіп екі есе артады.

Сусыздану кезінде ми қандай жағдайда болады.

Біздің миымыз 75% судан тұрады. Су балансының бұзылуы ми құрылымының өзгеруіне, энергия жетіспеушілігіне және оның қалыпты жұмыс істеуі үшін қажетті барлық процестердің тежелуіне әкеледі, миға оның алдында тұрған міндеттерді шешу қиынға соғады.

Сонымен қатар, мидағы дегидратация жағдайында көңіл-күйді тұрақтандыратын және эмоцияларды реттейтін нейромедиатор (нейрондар арасындағы байланысты қамтамасыз ететін химиялық «хабаршы») серотонин бөлінуі күрт төмендейді. Бұл процесс кортизол – «стресс гормоны» бөлінуінің артуымен бірге жүреді. Осы екі фактор – серотонин гормонының бөлінбеуі  және кортизолдың артық болуы көңіл-күйді нашарлатады және мазасыздықты арттырады.

Сондықтан, эмоцияңыз шамадан тыс болған кезде су ішіңіз — бұл сізге сәл жеңілдік сыйлайды дей аламыз.