ҚР ПІБ МО Ауруханасының Бас тәлімгері жұмысқа жаңа қабылданған қызметкерлермен кездесті

Шара барысында мекеменің қызметі туралы таныстыру презентациясын Бас тәлімгер Сәуле Дүйсебекқызы Кисикова өткізді. Жаңа қызметкерлерге ұйымның құрылымы, миссиясы және корпоративтік құндылықтары жайлы маңызды ақпаратты қамтитын арнайы кітап ұсынылды. Кездесу 2025 жылдың 30 тамызы мен 30 қыркүйегі аралығында қабылданған қызметкерлерге арналды.

Сонымен қатар осы жылдың маусым айында сынақ мерзімінен өткен қызметкерлермен атқарылған жұмыс туралы ақпарат берілді. Екінші санатты тәлімгерлер жаңа қызметкерлердің бейімделу нәтижелерін баяндап, бөлімшелер ішіндегі идеологиялық және тәрбиелік жұмыстың маңыздылығына баса назар аударды. Тәлімгерлермен қатар, сынақ мерзімінен өткен қызметкерлердің өзі де сөз сөйледі. Жеке әсер, пікірлер және еңбек жағдайлары мен бейімделу процестерін жақсарту туралы ұсыныстар айтылды.

Кездесу барысында кадрлардың ағымдылығы мәселелері де қаралды. Адами ресурстарды басқару бөлімінің бастығы Руслан Төлегенұлы Қабдулинов ағымдағы жағдайға шолу жасап, қызметкерлердің тұрақтылығын қамтамасыз ету бағытындағы алдағы жұмыстың негізгі бағыттарын атап өтті.

Шара конструктивті және достық атмосферада өтті. Ұжымдағы ынтымақтастықты арттырып, корпоративтік мәдениетті дамытуды қамтамасыз етті.