ҚР ПІБ МО ауруханасы TazaLike акциясы аясында сенбілік өткізді

Қазақстан Президентінің тапсырмасымен қолға алынған TazaLike акциясы аясында еліміздің әр өңірінде тазалық шаралары ұйымдастырылып жатыр. Бұл акцияға Президент Іс Басқармасы Медорталығың ауруханасы да қосылып, сенбілік ұйымдастырды.

Аталмыш сенбілікте қызметкерлер Аурухана орналасқан аумақты қоқыстан тазалауға белсене атсалысты. Олар бұл жолы медициналық қолғапты жұмыс қолғабына ауыстырып, қолына күрек пен тырма ұстап, жұдырықтай жұмылып лезде аумақты тап-таза етті. Көтеріңкі көңіл-күймен өткен акция ұжымның бірлігін арттырып, сенбілікке қатысқан адамдардың жауапкершілігін көрсетті. Бұл шараның басты мақсаты да сол – азаматтардың экологиялық мәдениетін арттыру, қоршаған ортаны таза ұстауды күнделікті өмір салтына айналдыру және әрбір азаматтың қоғам алдындағы жауапкершілігін күшейту.

Ұжым алдағы уақытта да белсенділігін жалғастырып, еліміздің әрбір тұрғынын тазалық пен экологиялық жауапкершілікке шақыруды мақсат етеді. Сонымен қатар, олар халықтың экологиялық мәдениетін және табиғатқа деген құрмет сезімін арттыру мақсатында түрлі шаралар – абаттандыру жұмыстарын және ағаш отырғызуды жоспарлап отыр. Осылайша, TazaLike акциясы еліміздің әр бұрышында өткізіліп, Қазақстанның әр қаласы таза әрі жасыл болуына үлес қосатынына сеніміміз мол.